Kurti shpreson që të trajtohet sa më parë aplikimi i Kosovës për anëtarësim në BE, në bisedën me Von der Leyen

(lajm i përditësuar)

---

Kurti shpreson që të trajtohet sa më parë aplikimi i Kosovës për anëtarësim në BE, në bisedën me Von der Leyen

Nga komunikata e Qeverisë bëhet e ditur se kryeministri Kurti e falënderoi presidenten Von der Leyen për mbështetjen ndaj Kosovës për zhvillim ekonomik, demokraci moderne dhe drejtësi ligjore, si dhe e njoftoi atë për arritjet dhe sukseset e vendit tonë në shumë fusha.

Kurti tha se shpreson që të trajtohet sa më parë aplikimi i Kosovës për anëtarësim në BE, sepse “me padurim presim që t’i marrim pyetjet e shumta nga Komisioni Evropian dhe t’ju përgjigjemi atyre sinqerisht me reforma të thella të brendshme, si shteti më pro-evropian i Ballkanit Perëndimor që jemi”.

Në këtë bashkëbisedim u diskutua edhe për domosdoshmërinë për deeskalim të situatës në katër komunat veriore të Kosovës dhe për normalizim të marrëdhënieve me Serbinë përmes zbatimit të Marrëveshjes Bazike.

Më tej, Kurti e informoi presidenten e Komisionit Evropian për konfiskimin e armatimit të shumtë para katër ditëve në Zveçan në një veturë me targa të Beogradit, në vendin ku para katër javëve u ushtrua dhunë brutale mbi ushtarët e KFOR-it, policët e Kosovës dhe gazetarët. Ai shprehu gatishmërinë e tij për zvogëlimin e pranisë së policisë në ndërtesat komunale në veri gradualisht e në proporcion me vendosjen e rendit dhe ligjit, gjë që njëkohësisht do të mundësonte fushatë të hapur dhe fer para zgjedhjeve të parakohshme demokratike në këto komuna.

---

Von der Leyen flet me Kurtin, thekson nevojën urgjente për deeskalim dhe kthim në dialog

Presidentja e Komisionit Evropian, Ursula Von der Leyen, ka biseduar mëngjesin e sotëm me kryeministrin Albin Kurti, në lidhje me situatën në veri.

Von der Leyen tha se gjatë bisedës, Kurtit ia theksoi nevojën urgjente për deeskalim dhe kthim në dialogun e lehtësuar nga BE-ja për normalizimin e marrëdhënieve me Serbinë.

“Do të flas me presidentin Vuçiq më vonë sot”, shkroi Von der Leyen në Twitter. /21Media