Raportoi rrejshëm se u dhunua seksualisht nga dy persona, arrestohet një grua në Gjilan
Prokuroria Themelore e Gjilanit ka ndaluar një grua me inicialet N.R, për shkak të dyshimit se ka kryer veprën penale “Lajmërimi apo kallëzim i rremë”.
Sipas njoftimit për media, e dyshuara kishte raportuar se derisa kishte qenë duke ecur tek varrezat e qytetit në Gjilan së bashku me djalin e saj, ishte ndaluar nga dy persona të maskuar, të cilët nën kërcenim e kishin tërhequr brenda rrethojës së varrezave, “ku pastaj sipas saj e kishin dhunuar seksualisht dhe ia kishin grabitur me forcë stolitë e arit”.
Tutje thuhet se janë siguruar dëshmi se gjithë ngjarja ka qenë një inskenim dhe e njëjta ka raportuar rrejshëm me rastin e lajmërimit të saj në polici.
“Prokuroria Themelore në Gjilan, në koordinim të plotë me Njësinë e Hetimeve Rajonale në Gjilan, me qëllim të zbardhjes së këtij rasti kanë ndërmarrë veprime intensive hetimore, ku bazuar në provat e marra, deklarimet e palëve të përfshira në rast, raportet mjekësore nga Instituti i Mjekësisë Ligjore, analizimit të shumë materialeve me video-incizime janë siguruar janë siguruar dëshmi se gjithë ngjarja ka qenë një inskenim dhe e njëjta ka raportuar rrejshëm me rastin e lajmërimit të saj në polici”, thuhet në komunikatën e përbashkët të Policisë dhe Prokurorisë./21Media
Dëshiron ta dëgjosh këtë lajm me zë?