Mbetje të supozuara njerëzore gjenden në rrënojat e nëndetëses Titan

Mbetje të supozuara njerëzore janë gjetur në rrënojat e nëndetëses Titani, e cila shpërtheu javën e kaluar rreth tre kilometra nën sipërfaqen e oqeanit, duke lënë pesë persona të vdekur, sipas njoftimit nga Roja Bregdetare e SHBA-së.

Roja Bregdetare do të transportojë provat e gjetura nga Atlantiku verior në një port të SHBA-së ku profesionistët mjekësorë do të kryejnë një analizë zyrtare të mbetjeve, thanë zyrtarët.

“Dëshmitë do t’u ofrojnë hetuesve nga disa juridiksione ndërkombëtare njohuri kritike për shkakun e kësaj tragjedie. Ka ende një punë të konsiderueshme për t’u bërë për të kuptuar faktorët që çuan në humbjen katastrofike të Titanit dhe për të ndihmuar që një tragjedi e ngjashme të mos ndodhë më”, tha Jason Neubauer, një kapiten i Bordit të Hetimit Detar.

Pjesët e anijes së shkatërruar u sollën në breg në Newfoundland në Kanada. /21Media