Konfirmohet padia ndaj Google për diskriminim të gjuhës shqipe

Gjykata e lartë e Kalifornisë e ka konfirmuar padinë që i është bërë gjigantit Google për diskriminim ndaj gjuhës shqipe.

Kjo është bërë e ditur nga Neshad Asllani dhe Haki Derivishi të cilët kanë qenë edhe iniciuesit e kësaj padie.

Me këtë rast Google ka kërkuar afat prej 15 ditësh për të dhënë përgjigje, mbi justifikimin se i duhet më shumë kohë për të përgatitur dhe dhënë një përgjigje.

Kjo marrëveshje e nënshkruar nga paditësi dhe Google pritet të zgjatet deri më 18 dhjetor 2023.

Padia është ngritur për shkak se diskriminimi i vazhdueshëm i gjuhës shqipe nga Google ka bërë që shqipfolësit të diskriminohen nga pjesa tjetër e Evropës dhe botës në zhvillimin e biznesit, marketingut dhe gazetarisë, pasi janë të përjashtuar nga Platformat Google Ads, Google Adsense dhe Google Admob.

Për padinë ndaj Google për diskriminim të gjuhës shqipe janë njoftuar edhe Ambasada e Republikës së Shqipërisë dhe e Republikës së Kosovës në SHBA.

“Investimi dhe kontributi i jashtëzakonshëm i Dr. Asllani dhe Z. Dervishi do të krijojë mundësi dhe përfitime të jashtëzakonshme financiare për portalet, kanalet televizive, gazetarët, blogerët, këngëtarët, agjencitë e marketingut dhe institucionet e tjera.Të ardhurat për të gjitha kompanitë që reklamojnë shërbimet dhe produktet e tyre në Google do të rriten gjithashtu. Kjo do të ndikojë në rritjen e punësimit, investimet e huaja dhe të ardhurat nga taksat mbi fitimet dhe qarkullimin e mundësuar nga Google.”, thuhet në njoftim.

Diskutimet shtesë mes Asllanit dhe Dervishit me avokatët dhe zyrtarët e Google do të zhvillohen gjatë dhjetorit 2023.

“Komunikimi është shumë miqësor dhe pritshmëritë për zgjidhje të pranueshme reciprokisht për të dyja palët janë reale.”, thuhet në njoftim.