Gjoba për bizneset që nuk vendosin flamujt te produktet

Ministri Shala ka kërkuar që bizneset sa më parë të fillojnë t’i vendosin flamujt tek produktet

Bizneset tashmë kanë filluar vendosjen e flamujve të origjinës së produkteve nëpër markete e tyre, por shenjëzimi i tyre ende nuk ka përfunduar. Ndërsa, për ata që nuk e respektojnë këtë udhëzim administrativ, Ministria e Tregtisë dhe Industrisë ka paralajmëruar ndëshkime.

Vendimi për vendosjen e flamujve te produktet ishte marrë më 29 dhjetor të vitit të kaluar, teksa ministri i Tregtisë dhe Industrisë, Endrit Shala kishte nënshkruar udhëzimin administrativ që urdhëronte marketet të vendosin flamuj sipas origjinës së produktit, vendimi ky i cili filloi të aplikohet që nga 1 janari.

Krahas kësaj, vendosjen e flamujve të produktet e kanë mirëpritur qytetarët e Kosovës, ndonëse disa prej tyre deklarojnë se ata flamuj nuk i kanë parë nëpër shoqëritë tregtare.

Emre Sherif për Kp ka thënë se i ka parë flamujt e vendosur nëpër markete dhe se kjo ofron lehtësi për t’i gjetur më lehtë produktet vendore.

E Fahri Duraku u shpreh se nuk ka parë nëpër markete flamuj të origjinës, por që ky veprim u ndihmon konsumatorëve të përzgjedhin më lehtë se çka do të konsumojnë.

Ministri i Tregtisë dhe Industrisë, Endrit Shala ka theksuar se inspektorati i MTI-së ka filluar inspektimet nëpër shoqëritë tregtare. Ai ka kërkuar që bizneset sa më parë të fillojnë t’i vendosin flamujt te produktet.

“Ligji është në fuqi nga 29 dhjetori i vitit 2018 të gjitha shoqëritë tregtare në Republikën e Kosovës janë të obliguara ta respektojnë këtë ligj, atë nen të caktuar që tek secili çmim i produktit i cili shitet në tregun e Kosovës në anën e majtë të çmimit duhet të jetë i vendosur flamuri i origjinës së atij produkti. Ligji tashmë është në fuqi ne si ministrin e Tregtisë jemi duke i inspektuar të gjitha shoqëritë tregtare, jemi duke i vetëdijesuar që sa më shpejt të fillojnë edhe ato të cilat nuk i kanë ato t’i vendosin, dhe shumë shpejt ministria e Tregtisë dhe Industrisë, inspektorati i saj dhe inspektoratet tjera komunale do të vazhdojnë edhe me shqiptimin e masave ndëshkimore që përcaktohen me ligjin për mbrojtjen e konsumatorit…Përndryshe masat ndëshkimore të parapara me  ligjin për mbrojtjen e konsumatorit do të merren ndaj secilës shoqëri tregtare e cila nuk e respekton ligjin”, ka shtuar Shala .

I pari i tregtisë dhe industrisë së Kosovës është zotuar se varësisht prej masës, të cilën inspektorati e sheh që është bërë shkelje do të ndëshkohen edhe shoqëritë tregtare.

Nora Jusufi nga Instituti GAP vendosjen e flamujve tek produktet nëpër markete e ka vlerësuar si një iniciativë të mirë, e cila mbron konsumatorin dhe ia lehtëson atij përzgjedhjen e produkteve që dëshiron t’i konsumojë.

Sipas saj, përmes këtij veprimi ndërprehet edhe mashtrimi indirekt ndaj konsumatorit. Jusufi ka konsideruar se gjobat ndaj shkelësve duhet të jenë në proporcion me moszbatimin e udhëzimit administrativ për vendosjen e flamujve.

Kujtojmë se vendimi për vendosjen e flamujve ka ardhur pak pasi Qeveria e Kosovës kishte vendosur taksë 100 % ndaj prodhimeve nga Serbia dhe Bosnja e Hercegovina, si reagimit ndaj një fushate të ashpër diplomatike të Serbisë kundër aplikacionit të Kosovës në Interpol dhe qëndrimit mbështetës të Bosnjës ndaj politikës së Beogradit.