Aleanca e Partive Liberale të Evropës: Serbia të përmbahet nga inkurajimi i sulmeve ndaj Kosovës

Aleanca e Partive Liberale të Evropës u ka bërë thirrje autoriteteve në Serbi që të bashkëpunojnë plotësisht me komunitetin ndërkombëtar dhe autoritetet e Kosovës në hetimin dhe sjelljen para drejtësisë të përgjegjësve për sulmin më 24 shtator në veri të Kosovës me armë të rënda kundër patrullave të policisë së Kosovës ku u vra polici Afrim Bunjaku.

Sipas kësaj aleance  Serbia duhet të angazhohet për normalizimin e marrëdhënieve.

“Autoritetet në Serbi duhet të përmbahen nga mbështetja dhe inkurajimi i sulmeve të dhunshme kundër Kosovës dhe duhet të angazhohen plotësisht për normalizimin e marrëdhënieve me Kosovën si parakusht për anëtarësimin në BE”.

Aleanca e Partive Liberale të Evropës ku bën pjesë edhe PDK-ja i ka bërë thirrje BE-së për rinisjen e dialogut.

“Prandaj ne i bëjmë thirrje Bashkimit Evropian të shtojë përpjekjet e tij dhe të sigurojë që dialogu i ndërmjetësuar nga BE-ja ndërmjet Kosovës dhe Serbisë të përshpejtojë ritmin dhe të sjellë përparim drejt reformave dhe normalizimit mes dy vendeve”, thuhet në deklaratë.