KFOR: Mbetet e paqartë se ku ndodheshin tre policët në momentin e arrestimit

KFOR-i ka lëshuar një deklaratë publike, duke thënë se bazuar në të dhënat e disponueshme, mbetet e paqartë se ku ndodheshin tre policët e Policisë së Kosovës në momentin e “arrestimit”.

KFOR-i po ashtu tha se në lokacionin afër Vijës Kufitare Administrative, si institucionet në Kosovë ashtu edhe autoritetet serbe kanë “përgjegjësi të qarta” për t’u koordinuar me KFOR-in, njofton rtv21.tv.

“I rikujtojmë të dyja palët përgjegjësitë e tyre sipas Marrëveshjes Ushtarako-Teknike ndërmjet Serbisë dhe KFOR-it, si dhe procedurat për koordinim ndërmjet Policisë së Kosovës, përfshirë Policinë Kufitare dhe KFOR-it”, thuhet në komunikatë.

KFOR-i po ashtu tha se ua rikujton të gjitha palëve se vendosja e Forcave të Sigurisë së Kosovës (FSK) në veri të Kosovës kërkon pëlqimin paraprak të komandantit të KFOR-it.

“U bëjmë thirrje palëve që t’u përmbahen këtyre marrëveshjeve dhe procedurave për të bashkëpunuar me KFOR-in. Ne u bëjmë thirrje të dyja palëve të përmbahen nga retorika provokuese dhe të shmangin çdo veprim të njëanshëm që mund të përshkallëzojë tensionin në zonë”, thuhet tutje në deklaratën e KFOR-it.

“KFOR-i mirëpret të gjitha përpjekjet e komunitetit diplomatik për zgjidhjen e kësaj çështjeje dhe mbështet dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës. Në koordinim me Policinë e Kosovës dhe EULEX-in, KFOR-i vazhdon të kryejë mandatin e tij si reagues i tretë – bazuar në Rezolutën 1244 të Këshillit të Sigurimit të OKB-së të vitit 1999 – për të siguruar një mjedis të sigurt dhe të sigurt dhe lirinë e lëvizjes, për të mirën e të gjitha komuniteteve në Kosova. Gjeneralmajor Ristuccia, komandant i KFOR-it, është në kontakt të rregullt me përfaqësues të institucioneve dhe organizatave të sigurisë në Kosovë, si dhe me përfaqësues të Forcave të Armatosura të Serbisë, Misionit të BE-së për Sundimin e Ligjit (EULEX), OSBE-së dhe komunitetit diplomatik”, përfundon komunikata. /21Media